小寶貝

La Cuisine De Veronica
加為朋友

Hunger is the best seasoning~ ♥

小寶貝

小寶貝

小寶貝

點煮網贊助

小寶貝

2016-05-23 |

其實我真係好唔明白點解咁多人一大咗肚就會送走一直養開既寵物?
點捨得架??

目前阿V屋企有6隻鼠鼠,全部分籠養,
之前有人叫我 + Mr.T 將鼠鼠送走,但我地係唔會睬佢既!
將來BB出世後,我地決定會繼續養鼠鼠,不過同一時間最多只會養2隻,
而而家養緊果6隻,一定唔會送走佢地,會一直養到佢地去彩虹橋為止~


棉花糖 (2014年1月18日 - 2015年7月19日)


舊年夏天臨返香港前,發現棉花糖心口生咗個腫瘤,
拿拿臨帶佢去獸醫處做手術........


手術後陰公豬足足輕咗20g.......


手術後大約有2星期時間要多休息,為咗避免棉花糖有劇烈運動,
暫時攞走哂佢最愛既玩具,結果佢悶到日日用可憐既哀求眼神望住我.......


帶棉花糖覆診,獸醫話佢康復進展良好,好快就追返手術前既體重!
所以我返香港都返得比較放心~

殊不知晴天霹靂...棉花糖既腫瘤突然翻發,仲已經擴散到腦部影響佢既行動,

最終喺我回英前2日去咗彩虹橋...當時Mr.T 唔敢話我知,接咗我機先同我講~
幸好棉花糖走時,Mr.T 一直抱住佢.......


雖然我有d嬲棉花糖唔等埋我返來先去彩虹橋,不過我知道佢已經好努力~
棉花糖係我養過最乖乖最溫柔既鼠鼠,從來無咬過人,
無論我點肉緊啜佢魚肉佢,佢都唔會反抗,
Mr.T 成日都話: 睇吓佢幾時頂唔順咬妳! (無試過喎! 呵呵~~~~)


Mr. Buttons (2013年11月17日 - 2016年1月3日)


Mr. Buttons 既離開一d都唔突然,有哂心理準備~


由當初領養細小瘦弱既佢,2年多養到佢肥騰騰成個波咁,
Mr. Buttons 一直都好健康活潑~


但有生命既野,始終都會有完結既一日......
舊年由香港返來後,留意到Mr. Buttons 雖然仍然好活潑,
不過開始慢慢消瘦 + 少量脫毛,一早已有心理準備~


Mr. Buttons 係我養過最長命既鼠鼠! 
同時亦係做過最多令我笑到碌地趣怪行為既鼠鼠........
只用兩隻後腳企鵝行、同Mr.T 玩鬥望遊戲、跳橋、用脷lam 個籠......
叫佢鍚鍚佢仲會用脷lam 你個鼻 LOL


棉花糖 + Mr. Buttons 去咗彩虹橋之後,
"第一代"鼠鼠只剩下戇居居既杏仁豆腐,成為咗老大!


仍然係兜風耳...仍然經常突然天然呆! XDDDD


而且佢既怪行為唔輸蝕得過Mr. Buttons!


依個究竟係咩鬼野pose 來? XDDDD


記得當初領養Sally Cake 返來後,寵物店打過一次電話來問鼠鼠有無異常......


後來發現Sally Cake 有點大細眼,兩隻眼經常輪流發炎生眼瘡!
不過佢一直食得玩得瞓得痾得,每次眼瘡都好快就好返,
所以我無帶佢睇過獸醫,只一直每星期餵佢2次魚肝油~


隨住Sally Cake 年紀開始大,中年發福.......


眼瘡不藥而癒,已經好耐無翻發過! ^^


Sally Cake 都開始老嘞! 以前整日爬橋無時停,
但而家最鍾意既活動係食野 + 瞓覺........


黑芝麻已來咗超過1年半,不過佢仍然係一貫一線鼠唔多親人既性格!


不過都叫做有改善 - 當初你齋望吓佢,佢都會呱呱叫鬧鬼你.......


而家只要有野食,佢總算肯比你抱上手......


黑芝麻有個好好笑既蠢習慣 - 倉鼠天性鍾意收埋食物,黑芝麻都會......
不過佢係將食物收喺糧兜下面! XDDDD


我 + Mr.T 覺得黑芝麻對手好大! 好似一隻帶咗棒球手手套既鼠鼠!! 哇哈哈~~~~


我 + Mr.T 都認為,舊年4月領養返來既小龍包係我地養過所有鼠鼠之中,
個樣最靚既鼠鼠! Mr.T 用"靚到乞人憎"來形容小龍包 LOL


除咗靚,個樣有時仲好嗲! 見到佢個樣心都軟哂~~~~


一雙電眼仲識得電人! XDDDD


經常擺出一副無辜純情樣,其實曳到不得了! 醒咗就無時停~


舊年7月由香港返來後,覺得小龍包個樣有點變咗......
唸咗好耐先發現佢塊面原本灰色,而家變咗全白!
會變色...即係話小龍包其實係一隻三線銀狐!! (我之前以為佢係一線花斑 =P )


咪睇佢一身白雪雪,查實佢好鬼污糟! 除咗鍾意喺屋仔裡面尿尿之外...仲成日周身屎屎!!


唔知點解經常有屎屎黐喺佢身體上唔同部位!! LOL


雖然小龍包又曳又污糟,不過佢真係超可愛~~~ ^^


其實舊年4月頭領養咗小龍包之後,5月尾我又pat pat 痕領養咗一隻小露寶 - 麥皮~


原因一來係因為佢個樣得意啦! 二來係我好耐之前養過好多小露寶,
但隻隻都係黐線既,無一隻可以乖乖抱上手交流,
不過我見香港台灣好多養小露寶既人,都可以馴服到隻小露寶變乖乖.....


咁啱見到有得領養,而且仲係小露寶BB,於是收養返來再試一次........


至今已差不多一年,麥皮見到我 + Mr.T 仍然好似見到鬼一樣......


就算有野比佢食都要咁樣! 仲要疑神疑鬼左聞聞右聞聞怕我落毒咁款...吹脹!


舊年7月由香港返來後,知道棉花糖去咗彩虹橋,
一直都好想再養一隻似棉花糖既長毛熊仔鼠! 但去過好多次寵物店都食白果.......
不過最後見到依隻驚青短毛熊仔幾合眼緣,於是帶咗佢返屋企,
起名"多啦A懵"~ XDDDD


多啦A懵應該係史上最鵪鶉既鼠鼠! 就算你只係望住佢完全唔郁,
佢都可以無啦啦驚到不停彈起!! 放佢出來散步仲要無端端賴尿........


我 + Mr.T 經過1個半月既努力,先得到佢既信任可以抱佢上手!


鼠鼠天性始終係為食,有野食當然更加溫馴 XDDD


雖然我比咗個傻名佢叫多啦A懵,不過佢一d都唔懵!
佢而家一想要零食,就會企喺依個位裝出一副可憐樣扮坐監,
不過佢又好似知道我唔會睬佢,所以佢只會對Mr.T 用依招,
如果Mr.T 都唔睬佢,Mr.T 行去邊,佢既可憐視線會跟到實一實,
直至佢得逞為止! XDDDD





點煮網贊助

回應

loading
點煮網贊助

小寶貝