火腿國南部Malaga 曬到燶之旅2015: Day 1 (4月20日)

La Cuisine De Veronica
加為朋友

Hunger is the best seasoning~ ♥

火腿國南部Malaga 曬到燶之旅2015: Day 1 (4月20日)

火腿國南部Malaga 曬到燶之旅2015: Day 1 (4月20日)

火腿國南部Malaga 曬到燶之旅2015: Day 1 (4月20日)

點煮網贊助

火腿國南部Malaga 曬到燶之旅2015: Day 1 (4月20日)

2015-05-02 |

上星期同Mr.T 去咗西班牙旅行,返到屋企之後兩邊膊頭曬到燶咗,又紅又痛又痕!
加上掛住追大時代重播,實在太精彩,攪到野唔想執blog 又唔想寫... =P

之前去旅行專揀大城市,貪食野 + shopping 都方便~
慢慢發現歐洲大城市來來去去都係果咋大集團式既店,
而且基本上歐洲各國好多product 喺英國越來越容易買到,
所以去旅行時shopping,對我來講已經變到其次再其次! 
重點落在有無特色野睇 + 食野方面一定無得妥協!!

上一次去西班牙地點係Barcelona,
記憶中除咗果個可以堂食又新鮮又平海鮮既market 之外, 
其他想睇既名勝好快都睇哂,相對歐洲其他國家大城市無乜特別,
旅程後半我同Mr.T 仲無聊到喺街邊餵白鴿........
今次換吓環境試吓新野...Mr.T 揀咗西班牙位於太陽海岸 + 地中海西岸既Malaga, 
實行來個陽光與海灘!


上星期一(4月20日)6.30am 早機,所以天未光就要出發去機場,
由Glasgow 到Malaga 機程約3小時10分鐘,西班牙比英國快1小時,
到咗Malaga,weekday 過海關超快,去埋一轉洗手間都未夠11am~


我地今次既落腳點係Malaga 其中一個大town - Fuengirola~
起程前已上網check 過喺Malaga 機場有shutter bus 直接去Fuengirola,
但我地一直搵唔到個站喺邊! 於是走咗去搭火車........


一出機場出口就係火車站! 竟然方便成咁!!
仲有就係由Malaga 機場到Fuengirola 需時大約35分鐘,
單程每人只需€2.70...好好好好好好平呀~~~~~~~~~
(喺英國真係完全唔洗旨意.........)


Malaga 係Costa del Sol (太陽海岸)地區,位於西班牙南部,地中海西沿岸~
搭緊火車尚未到達目的地Fuengirola,但沿途已可見到地中海靚海景!


大半粒鐘火車程...話咁快就到咗Fuengirola! ^^
Fuengirola 火車站出口就正正喺市中心,
由市中心行去酒店只需7分鐘左右,方便到無朋友!


天氣超好~ Mr.T 帶路兼幫我攞埋旅行袋~


Check in 依d粗重功夫緊係由男人去做啦! XDDDD
我就喺酒店大堂梳化印印腳...因為未夠鐘攞房! >_<


陽光與海灘...對於阿V依d又唔識游水好日又唔曬吓太陽皮膚白過吸血鬼,
初時都有d擔心Malaga 唔係我杯茶........

等咗30分鐘終於可以上房......
一打開房門阿V先尖叫,之後即時愛上咗Fuengirola! ❤ ❤ ❤



Mr.T 訂咗間無敵海景房喎~~~~


拿拿淋影幾張相掟上FB! XDDDD 
跟住就緊係換衫出去食野啦!


好近酒店有一條街叫做Fish Alley,餐廳酒吧林立,搵食緊係去果度啦! ^^
雖然叫做Fish Alley 但並唔係只食海鮮,基本上你想食乜都有 - 連中菜都有!!

不過鍾意食海鮮既我地,緊係揀間海鮮餐廳啦!
我地揀咗位於Fish Alley 既Restaurante Europa~


Mr.T 頭盆 - 海鮮湯
餐牌上既頭盆我只對依個湯有興趣,不過我成朝早不停飲水飲到肚漲,
唔想再飲碗湯,所以我無點頭盆~ 
飲咗Mr.T 兩啖湯,裡面有魚肉、蜆、大蝦、青口勁足料,湯充滿海鮮既鮮甜!


閒日加上時間尚早,餐廳客人唔多,好快就有主菜食嘞!


傻瓜Mr.T 既主菜 - 勁辣齋pizza
食肉獸Mr.T 無論去咩野餐廳,只要見到餐牌有勁辣pizza 佢就話要挑戰!
今次終於捉蟲了 - 佢點菜時無睇清楚餐牌......
依個pizza 既料只有茄醬、芝士 + 一大咋切碎辣椒,一塊肉都無!
好彩佢頭盆都飲咗個海鮮湯,第一餐不至於太慘烈~ XDDD


我個主菜Fish + Shellfish Grill 就正正正正嘞!!!
有青口、大蝦、蜆、大魷魚扒、三文魚扒 + 其他3塊唔知咩魚扒......


成盆都係我既! ^^ 賢妻當然有分d比傻瓜啦~
新鮮既海鮮唔需要刁鑽煮法,簡簡單單燒熟配香草牛油已香聞十里,
食到阿V lam lam 脷!


食飽飽天氣好,我地慢慢行去目的地 - Bioparc Fuengirola
由Fish Alley 行去Bioparc 大約10分鐘左右~


Bioparc 入口處有一棵Baobab Tree (猴麵包樹),
Baobab Tree 又名Upside-down Tree (倒轉樹),因為樹頂枝莖形似樹根,
似一棵倒轉咗既大樹而得名~ 
Baobab Tree 係一種非洲植物,好似依棵咁大需時1000年先長成,
不過Bioparc 依棵其實係人工造既假樹,係世界其中一棵最大既人工樹!


每日有2個時段,動物園職員會帶遊客穿過人工樹到另一邊狐猴區,
遊客可以近距離觀察狐猴,不過唔可以觸摸佢地~ ^^


有多個品種狐猴.......


是日天氣太好,隻隻都大爺咁款他條攤屍曬太陽 XDDDD


鱷魚區有網欄隔住,防止佢地跳起........


不過另一邊可以隔住大塊玻璃近距離面對大咋巨型鱷魚! @@
雖然隔住塊玻璃絶對安全,但都真係有少少驚呢~~~~


園內除咗有短吻鱷,仲有長吻鱷...我覺得佢地個樣似微微奸笑..... XDDD


是日天氣好好,好多動物都出來曬住太陽覺覺豬...zzzz.......



老虎又係隔住玻璃近距離,可惜佢瞓咗覺........


銀背大猩猩喺電視動物記錄片就睇得多,真既今次第一次見!


仲可以咁近距離,阿V興奮又緊張........


尤其當佢以唔多友善既眼神同我四目交投....... XDDD


除咗銀背之外,仲有紅毛猩猩~
依隻紅毛猩猩超古惑!! 每次我一舉起相機佢就會拎轉面或葺低頭,
當我扮野望去第二度,佢就會正面望住我,到我望返佢,佢又拎歪面......
影咗好多張相先影到佢既正面!!


另一種我第一次見實物既爬蟲類 - Komodo Dragon 科莫多巨蜥
園來飼養既暫時仲係BB 來,體型尚未算巨,無電視記錄片果d咁嚇人~ ^^


園內有一雀鳥範圍,裡面既禽類喺遊客身邊自由飛來飛去或行來行去........


孔雀就咁喺你腳邊行過......


Bioparc 地方唔算大,整個動物園分成4個區域,
若好似我 + Mr.T 鍾意睇動物,慢慢行慢慢磨大約3粒鐘就行哂,
咪普通動物園一個,有咩咁特別?

Bioparc 特別既地方係 - 我暫時去過所有動物園之中管理得最好、
動物狀態最健康、生活得最自由寫意、最可以睇到動物真正生態習性、
環境最乾淨衛生...既動物園! 
動物園有異味好正常...不過我地喺Bioparc 行咗幾粒鐘,真係一次異味都無聞到!!

唔同品種動物同區自由走動,直情迪迪尼卡通片咁款~ ^^


好鍾意依個動物園,絶對值得一遊! ^^
不過美中不足係當我地行完既時候,
發現剛剛錯過咗最後一場動物表演........ >_<

http://www.bioparcfuengirola.es


離開Bioparc 後行返海邊既酒店,發現街上好多雪糕沙冰店,
我要咗個菠蘿芒果沙冰,好好飲!


天氣實在好得交關,見到海連天天連海一望無際蔚藍色,忍唔住落咗沙灘散步,
復活節假期剛過,加上係閒日,遊客唔多唔會迫滿沙灘,
同Mr.T 一邊散步一邊講白痴廢話,再加埋好relaxed 既海浪聲,好浪漫啊~ XDDD

https://www.youtube.com/watch?v=ueVNnYhYn78


是日實在太早起身搭飛機,
行完沙灘後忍唔住返咗酒店小睡一粒鐘......

瞓醒就到晚餐時間嘞! =P 晚餐我地喺海邊隨意揀咗一間餐廳 - Sol Y Mar Cafe~
點菜時見到鄰枱上菜份量好多,所以我地都無點頭盆直接要主菜.......


Mr.T 晏晝主菜食咗素,佢話過晚餐時一定要食肉...點咗個牛仔肉闊麵~



我就緊係食海鮮啦! 烤龍脷魚
我超級超級鍾意食龍脷!!! 肉厚滑又鮮味...可惜蘇格蘭好少見到有大條龍脷魚賣......
Fuengirola 幾乎間間餐廳都有龍脷魚供應,價錢仲唔貴,簡直係我美食既天堂~~~


睇吓條龍脷幾巨型! ^^ 唔止條龍脷魚好味,
連配菜果幾塊牛油薯仔都係我鍾意既waxy 口感! 超好味超滿足~~~~
食飽飽後就返酒店休息,準備第二朝早起去行市集! ^^




點煮網贊助

回應

loading
點煮網贊助

火腿國南部Malaga 曬到燶之旅2015: Day 1 (4月20日)