自製滑滑豆腐花 (熟石膏粉方法)

La Cuisine De Veronica
加為朋友

Hunger is the best seasoning~ ♥

自製滑滑豆腐花 (熟石膏粉方法)

自製滑滑豆腐花 (熟石膏粉方法)

自製滑滑豆腐花 (熟石膏粉方法)

點煮網贊助

自製滑滑豆腐花 (熟石膏粉方法)

2014-11-06 |

雖然我唔好甜...但我好鍾意食豆腐花~
對我來講...要有豆香先可以叫做豆腐; 要加多個"花"字就必定要滑滑,
若欠缺以上兩點,根本唔應該叫做豆腐花,
只可以叫做"無味白色野" - 即係英國中式超市賣果d!!

仲有就係 - 我只鍾意食熱既豆腐花!
所以唔可以用簡單既大菜或魚膠粉方法,只可以用傳統凝固劑方法~
之前試做過2次豆腐花都失敗,豆腐花唔凝固散筲筲,
檢討後發現失敗主要原因係凝固劑份量用得太少!
而凝固劑用量同水質又有密切關係e.g. 水既硬度~
原則上水中礦物質含量越高(硬水),凝固劑用量要相對減少;
而蘇格蘭係屬於軟水,所以我喺凝固劑份量上作出調較後,終於成功做出滑滑豆腐花!


當然要成功做出好食既豆腐花仲有其他重要因素:

a. 浸黃豆: 黃豆最好浸過夜,一來確保可以浸透,容易打出足夠濃度既豆漿,同時可以減少黃豆中有害物質皂豆素;

b. 豆漿濃度: 若豆漿太稀唔夠濃,豆腐花難凝固成型兼無豆香;

c. 過濾豆漿: 自磨豆漿一定要過濾乾淨,否則鬆散難凝固 + 影響口感;

d. 豆漿溫度: 不同凝固劑,豆漿有不同凝固溫度,溫度要準確,所以最好預備1枝溫度計;

e. 沖豆漿方法: 不同凝固劑沖漿方法有所不同,大前提係要確保豆漿 + 凝固劑充份混合~


1. 黃豆200g 浸水過夜,搓洗乾淨,盡量去掉黃豆皮。


2. 對清水1L分4次放入blender 打成生豆漿。


3. 生豆漿倒入棉紗濾布過濾第一次,隔出豆渣。


我用依種棉紗濾布...3塊叠埋一齊來過濾~


4. 將(3)隔出來的生豆漿過濾第二次。(我用依個£1店買既有框濾袋,非常好用!)


5. 生豆漿過濾第三次,進鍋煮滾後用湯匙除去浮面泡沫,調低火力保持小滾煮10分鐘。


6. 預備一個保溫力佳的有蓋容器。(LC Stoneware Round Casserole 係一個好選擇!)


7. 小碗中放入熟石膏粉3/4茶匙、粟粉1/4茶匙和清水4湯匙拌勻。


熟石膏粉


8. 以溫度計確認一下豆漿溫度降至80C-90C。


9. 將(7)和豆漿一同沖入容器內,先以棉布蓋住容器,然後再蓋上蓋子,不要移動容器或偷看,待45分鐘即成。


由細到大我食豆腐花都唔鍾意用糖水! 我鍾意原味無糖豆腐花直接加依種紅糖~
(鍾意糖水既可以用片糖 + 清水煮溶~)


終於都可以喺蘇格蘭食到一碗充滿豆香兼滑滑既豆腐花! 食第一啖時好感動~~~
雖然我整咗3次先成功,但我見過有人話整咗十幾次都失敗...所以我已經好幸運!


最重要係...我以後豆腐花癮起時,唔洗再食中式超市"無味白色野"!! XDDDD


隔出來既豆渣唔好揼走咁浪費啊! 豆渣煙肉雜菜蛋餅食譜click here~




點煮網贊助

回應

loading
點煮網贊助

自製滑滑豆腐花 (熟石膏粉方法)