一條冷返香港食食食2009 - 粥粉麵

La Cuisine De Veronica
加為朋友

Hunger is the best seasoning~ ♥

一條冷返香港食食食2009 - 粥粉麵

一條冷返香港食食食2009 - 粥粉麵

一條冷返香港食食食2009 - 粥粉麵

點煮網贊助

一條冷返香港食食食2009 - 粥粉麵

2009-04-19 |

返到香港除咗歎茶之外,最常食既就係粥粉麵!

榮記牛什粉麵餐廳

到香港當日仲係早上(3月13日),已好鬼掛住香港既牛雜! V媽媽接咗我返屋企放低行李後,即時喺屋企附近整返碗牛雜粉! 由於V媽媽已食咗早餐,所以佢只飲野陪我食.....

 先來一碗牛膀牛肚米線......正!

 加多碗淨牛筋丸......正正!!

 再來一碟火腿煎蛋飯~ 依個都唔錯!

(有睇過我之前既香港遊記的話,都應該知道我返香港好鍾意食茶餐廳火腿煎蛋飯依個怪習慣!)

榮記喺我香港娘家附近,係一間潮州式既粉麵店~ 我由細食到大,除咗牛雜之外,我既推介係佢地既牛筋丸! 非常爽脆彈牙~~~

地址: 太子花園街226號地下

 

陳記燒鵝粉麵茶餐廳

要食好味既燒鵝,唔洗去到深井咁鬼遠嘞!

"陳記"喺金魚街都有分店,所以做咗V爸爸 + V媽媽既早餐 + 午餐飯堂,佢地幾乎每日都喺陳記order 早、午2餐~~~

舊年11月返香港,V媽媽買咗隻巨型燒鵝脾過我,我一食就食上癮!

 今次返到香港,幾乎日日一碗燒鵝瀨! (我要食"胸"果喎~~~)

 有時一碗燒鵝瀨並唔夠喉,於是再整多碗油雞瀨! (打緊依篇野睇到相都流口水~~~~~)

 除咗我心愛既燒鵝之外,佢地杯奶茶仲好正! 夠哂香濃,我日日都要整返杯至安樂~~

 佢地既午市套餐都唔錯,每日都唔同款式,包例湯 + 飲品~ 相中依碟三絲炒意粉炒得非常夠鑊氣!!!

地址: 旺角通菜街166號

 

樂園牛丸大王

以手打牛丸聞名既"樂園牛丸大王",同樣係一間潮州式既粉麵店! 不過今次我冇食佢地最出名既牛丸......

 牛膀米線~ 正!

 潮州方魚肉碎粥~ (方魚即地仔魚乾~ 我唸住試吓自己整依個!)

 淨魚札 + 魚皮餃~

好辣既人記住要食佢地既辣椒油!!! 

地址: 旺角弼街45號地下 

 

麥文記麵家

樣樣都"d屎"咁鬼細碗又貴,但樣樣都好鬼好味!

 店面已唔算細,但就成日爆棚! (尤其黃昏一段時間~),裡面爆棚,外面門口大棚人等位!

 佢地其中一樣招牌菜 - 南乳豬手麵~

 香噴噴牛腩麵~ (有好多牛筋架!)

 超好食鮮蝦雲吞~ 麥文記既雲吞,除咗蝦之外並冇豬肉等其他材料! 對雲吞只係一般既我,都覺得超級好味~~~~ (記得同浙醋同食喎!)

麥文記每一樣食物都係用細碗盛載,不過最平果樣都要$24蚊一碗! (細碗都要廿幾蚊,我覺得貴呀!) 但佢地既食物非常出色! 順帶一提 - 佢地既麵全部都係手打~ 我從未食過咁爽口彈牙既麵~~ 難怪成日都爆棚啦!

等耐d...貴d...座位窄d坐得冇咁舒服......都係值得既!

地址: 佐敦白加士街51號地下

 

長洲偉記

舊年已經同大家介紹過既長洲大排檔偉記,佢地無論係魚蛋、牛腩定係炸魚片都係一絕! 大家去開長洲的話,一定要去試試!

不過提提大家 - 偉記星期一係唔開門架! (上次就有網友試過食閉門羹嘞.....)

 令我非常想念既一餐!!

 唔知點解佢地既牛腩粉,大碗過魚蛋粉??

 佢地既魚蛋並非爽口彈牙果隻,但就食得出完全真材實料 - 啖啖魚味 + 冇加粉!

 佢地既炸魚皮係我食過最好食既! 我由香港帶返來英國果一大樽,last 咗成個星期,都仲係好似啱啱炸出來咁鬼脆~~~~

 如果鍾意食辣的話,一定要食佢地既辣椒油! 又香又勁辣~ (小心~ 真係好勁辣架!)

 

除咗粉麵,我仲好鍾意食粥......

海皇 / 海景

 一向都係去開海皇,我既例牌餐 - 豬紅牛肉粥, 炒麵 + 淨腸粉~

 有一晚突然興起要食宵夜,因為海景近d於是試吓海景~ 發現原來海景粥底比海皇更好食喎!

 

譚仔雲南米線

返香港前嘗試自己整咗譚仔好出名既名菜 - 土匪雞翼~ 老公 + 我都覺得好香好好味!

不過當時我仲未食過土匪雞翼既真身。只見網上好多人一面倒地讚有幾好食 + 有幾咁香! 好似"此雞翼只應天上有"果隻咁......

 返到香港發現原來旺角都有間譚仔,於是走去試試~

 我要咗碗豬潤酸辣湯底米線~ 味道唔錯! 豬潤又新鮮又片得薄,米線煙靱,而且好多芽菜仔!

 我自己另外要咗3隻土匪雞翼~ 我見個個客人面前都有一碟咁滯,我唸應該真係好好味......

真係唔好意思都要講句 - 好不外如是囉! 我真心覺得我自己整既版本,好食過依3隻譚仔土匪雞翼好多! (話我大口氣都係咁話嘞~~~) 我完全食唔到所有人講既所謂香味,味道真係好一般~ 真係唔親身試過,都唔知原來有d野可以overrated 得咁緊要.........

 

 

 

點煮網贊助

回應

loading
點煮網贊助

一條冷返香港食食食2009 - 粥粉麵