點煮網贊助
好鬼難食既......
2011-11-05 | ♥ V發乜鬼口痕
為食既我基本上好少會覺得一種食物係難食，
極其量我只會覺得唔好食既啫~
不過今次我試咗一樣我覺得超級難食既食物，
難食程度堪稱恐怖!!!!!!!!!!!
就係Jellied Eels (鱔魚凍)!
Jellied Eels 源於17世紀後期倫敦，
為當時一種營養豐富且價廉既食物，
時至今日已成為有代表性既倫敦小食~
來英多年久聞Jellied Eels 大名，
不過一直未有機會試~
蘇格蘭未見過其蹤影;
每次去倫敦又只掛住食日本菜，
並無特登去搵過售賣Jellied Eels 既店......
今次喺Birmingham 比Mr.T 留意到Bullring 室內市場裡面，
有一檔附設小食攤既海鮮檔竟然有售賣Jellied Eels!
仲有我經常都好恨食既海螺肉(Cooked Whelks)!!
即時每樣打包一兜!
依種海螺肉已經煮熟咗，可以即食~
食味鮮甜類似東風螺或食buffet 時果種翡翠螺，
不過蘇格蘭魚檔或海鮮餐廳都無見過，
間中喺中式超市鮮魚檔會見到有連殼生猛海螺(比翡翠螺大隻少少!)，
不過唔知點解我未買過來食?
(可能太懶唔想自己煮!!?!?)
大舊肉充滿海水香，鮮甜又唔韌~
可惜無咗條螺尾......講返本篇既主角 - 恐怖既Jellied Eels!
查實依兜野賣相已經好唔掂，本身都無期望過佢會好食......
只不過話哂來英咁耐都未試過，先特登買來試吓，
要試過先有資格話佢好食或唔好食架嘛!
切成一段段既鱔魚(多數係silver eel!)
封喺用香料煮成後再凝固成啫喱狀既清湯裡面，
據知清湯材料有洋蔥、香葉、白酒醋、檸檬汁、黑胡椒、海鹽、parsley、cayenne pepper、nutmeg，蛋白 + 蛋殼 (無錯係蛋殼!)
食時加入少許檸檬汁或麥芽醋~
材料看似豐富，不過我既食後感係......
完全無調味既白烚鱔魚，封喺完全無色無味既啫喱裡面!
唯一食得出既味道，
係來自鱔魚果層厚厚滑滑既皮...果陣好可怕既"腥味"!!
鱔魚一入口，一股腥氣隨即遍佈口腔每個角落，而且久久不散......
最大鑊既係 - 之後我食咗十幾粒麥樂雞加BBQ sauce，
仍然遮蓋唔到腥氣!
恐怖呀呢?
雖然味道好嚇人，但我唔想浪費，
唯有狂落麥芽醋勉強吞哂成兜野......
老公覺得我勇氣可嘉!
後悔嗎? 咁又無後悔喎!
至少我試咗新野嘛~
而且若我下次去倫敦時撞見Jellied Eels，
我好大可能會再買來食 - 可能只係咁啱撞正依檔難食呢!!
點煮網贊助
回應
點煮網贊助
社交網