孖T香港日食夜食2008 - 好味午餐篇

La Cuisine De Veronica
加為朋友

Hunger is the best seasoning~ ♥

孖T香港日食夜食2008 - 好味午餐篇

孖T香港日食夜食2008 - 好味午餐篇

孖T香港日食夜食2008 - 好味午餐篇

點煮網贊助

孖T香港日食夜食2008 - 好味午餐篇

2008-12-12 |

返到香港我 + 老公又點會食得咁少野呢!?!?? 不過冇理由3個星期逐日講架嘛~ 所以而家先來個總結!

 

雖然香港係飲食天堂,但有好食既,當然亦有唔好食既! 不過始終大部份都係好食既!!!

先講好食既~ 排名不分先後......

>>>>>>>>>>>>>>>>>>>>>>>>>>>>>>>>>>>>>>>>>>>>>>>

Cafe Landmark: 每次返香港必去既餐廳~ 食物賣相水準俱佳

Thumbs Up
,食完野仲好方便我去shopping!

 我既頭盤必點 - Lobster Bisque (龍蝦湯)~

 老公其實都好鍾意Lobster Bisque...不過佢見比我點咗 + 想試吓新野~ 於是點咗Crab Meat Chowder (周打蟹肉湯)~

 我既Fillet Steak with Foie Gras & Asparagus (牛柳配鵝肝鮮露筍)~

 老公既Steak Sandwich with Chips (牛扒三文治配薯條)~

P.S. 返香港前見到雜誌介紹ThreeSixty...於是食完lunch 就去樓上睇睇...點知好鬼失望!!!! 我最初以為ThreeSixty 會似CitySuper...點知原來ThreeSixty 係一間完完全全既西式超市!!! 感覺似入咗一間好大既Lidl......

 

太平館: 香港有4間太平館 - 油麻地、尖沙咀、銅鑼灣 & 中環; 除咗中環果間我冇去過之外,我認為最好食既係尖沙咀果間 (加連威老道),都係每次返香港必去既!

 必點頭盤 - 海龍皇湯~

 裡面有鮑魚片架!!!!

 好鍾意食佢地依種熱辣辣,又軟又甜甜地既"中式西餐餐包"~~~~

 必點菜 - 瑞士乳鴿~ 比起佢地普通既燒乳鴿,要等多20分鐘~ 但我覺得值!!!!

 老公咁鍾意豬扒,緊係要焗豬扒飯啦~ 我最鍾意佢地既焗豬扒飯夠乾身夠香!
Thumbs Up

P.S. 依餐係我地既"下午茶"~ 我地之前已食咗lunch,唔夠肚位食其他野...連老公好鍾意食既巨型梳乎厘都冇食到! 唯有等下次先啦......

 

利苑 Lei Garden: 唔係次次返香港都會去,不過自從第一次(好鬼耐) 食過佢地既鮑魚 + 翅,就愛上咗Lei Garden! 本來結婚時唸住喺度擺酒,點知撞啱佢地裝修...

 利苑裡面有幾個好大既魚缸,裡面除咗有大海魚 + 巨蟹之外...仲有好鬼大隻既鮑魚!

 我地試過食完鮑魚,叫佢留返個殼比我地!

我記得利苑有1道菜個名好好聽~ 係用蛋白 + 龍蝦做材料 (唔鬼記得咗個名! 好似叫咩"白玉"...咩龍之類...) 記憶中道菜幾考功夫~ 雖然唔記得個名,但依道菜好食到令我好懷念~~~

不過今次冇食鮑魚又冇食龍蝦...因為今次係同V媽媽 + 99去飲早茶!

 超脆皮既冰燒三層肉~ 好正!
Thumbs Up
 連個點既芥醬都好正!!!
Thumbs Up
 
Thumbs Up
 
Thumbs Up
 不過太鬼細碟......

 薄而滑既牛肉腸粉!
Thumbs Up

 幾好味既珍珠雞......

 不過就細舊到每舊似壽司咁上下!

 好味道既唔知咩菇炒河~ 但略嫌太油膩咗少少.....

 蘿蔔絲酥餅~ 好食! 好多蘿蔔絲~~~~~

 我為食而點既蛇羹~ 不過真係麻麻地!  味道雖然過得去,但又細碗又冇乜蛇肉...依碗野仲要$88!!! 真搵笨~~~~  

P.S. 我仍然鍾意Lei Garden~ 不過就覺得晚飯好過茶市咯!!!! 而且下次食蛇羹都係去返蛇王乜...蛇王物......

 

永合隆: 永合隆有"乳豬燒臘第一家"之稱,絕非浪得虛名~ 由於政府唔再出牌,所以永合隆係碩果僅存用炭爐去整燒臘既飯店!

佢地既乳豬 + 燒肉唔只芝麻皮咁簡單...唔識點形容!!!! 總之第二度食唔到啦~~~~ "了"咀既我就算蒙住眼都一定食得出分別!

永合隆既燒全乳豬,係V媽媽還神必備既"御用乳豬"! 其他燒臘店既燒全乳豬都只係幾舊水有交易; 但永合隆既乳豬就一定要過千! 不過一分錢一分貨......炭燒真係唔同d既!!!!

 去親都係...每人燒肉1碟 + 2個白飯加色 (豉油)~~~~

 仲有佢地味道十年如一日既例湯 - 金銀菜豬肺湯~ 正!
Thumbs Up

P.S. 記得以前喺香港過時過節,幫V媽媽去排隊買燒肉...條隊排到出門口大長龍~~ 要排成粒鐘先買到燒肉返去!!!! 於是我無辜地比V媽媽鬧 - 佢以為我去咗行街.....

 

富記: 蔡瀾都幫襯既歷史悠久超街坊食肆~ V爸爸同V媽媽拍拖時,已經常幫襯位於上海街既舊店架嘞!

 必食1 - 炒飯~ 除咗豬扒,炒飯係老公第2最愛食物! 舊年第一次帶老公去富記,佢對富記炒飯驚為天人~~~~ 今次仲話要食2碟!!!

 必食2 - 生滾魚雲湯~ 湯充滿魚既鮮甜味! 材料可有多個選擇e.g. 魚片, 魚腩, 豬潤, 及第, 肉片...又可配多種時菜~~~ 不過我獨愛魚雲滾白菜仔! (魚雲好快賣哂~~ 要食就要早d去!!!)

 必食3 - 白切雞~ 富記既白切雞,一向有種其他地方食唔到既獨特味道! 而且佢地既雞好細隻,就算係雞胸,肉質都好軟滑~~~ (不過今次碟雞好似有少少失水準喎!!! 希望只係one off 啦......)

一心去到富記...一坐低就問: 仲有冇鴨腸??? 點知我都係唔夠早去 - 已經賣哂!!!!

 佢地既白灼鴨腸好新鮮! 用來沾胡椒粉豉油最正~~~~

既然冇鴨腸,緊係要返其他野來補償......

 就要碟富記出名既阿伯送酒菜 - "心椗"~ 即係豬心心瓣 + 雞腳之類既下欄野,加花生頭頭尾尾咁炆埋一煲......

 再加碟唔太肥唔太瘦既牛腩~

 

台灣牛肉麵: 自從去過台北後,愛上咗台式牛肉麵!!! 不過香港既"台灣牛肉麵"開咗咁耐,今次我先係第一次幫襯~~~

時為黃昏,地點係廣東道既分店...喺尖沙咀shopping 後,我 + 老公決定返沙田晚飯之前,先來一個台式"黃昏茶"!

 我當然要個牛肉麵啦! 唔錯~ 湯底幾好味 + 牛肉亦夠軟入味...

 老公要咗個粟米雞粒炒飯~ 佢order 時我仲笑鬼佢 - 返到香港仲食呃鬼佬野???  點知個飯炒得好好味! 粒粒飯都係被蛋包住既金黃色~~~~

 見佢地餐牌上有醉雞,又叫咗碟! 好香好好食~~~ 不過唔識貨既老公就嫌紹興酒味太勁......

 見佢地做緊特價,口痕叫咗一小鍋雞燉翅......

 都幾多魚翅,而且個湯好鮮,食完都唔口渴!

 

麻布茶房 (Azabusabo): 第一次去麻布茶房,係06年夏天第一次去台北; 舊年返香港時,發現香港原來都有麻布茶房(旺角新世紀)~ 不過當時覺得選擇 + 水準都及不上台灣......今次去咗沙田既分店,除咗選擇多返之外,亦相當好味!!!

 老公既溫泉蛋牛柳定食~

 靚靚既糖心溫泉蛋......

 而我就要咗燒鯖魚定食~

 

吉野家: 我以前成日將味千拉麵 + 吉野家混淆~ 一路都覺得吉野家係食拉麵...而且唔知係咪受佢招牌顏色影響,我仲以為吉野家係食"炸物"多既!  所以咁耐都未幫襯過......

今次係因為見到巴士廣告,我先知道原來吉野家係牛丼專門店!!! 我 + 老公都好鍾意牛丼,拿拿淋去幫襯!

 雙拼係新野,我既~  牛丼 + 可樂係老公既; 另加再order 多份燒鯖魚~

2個飯都好好味! 不過如果老公個牛丼有埋隻窩蛋就perfect 嘞~~~~

 睇高木直子既"一個人住第5年",裡面提到吉野家既味噌湯唔好飲,但我又覺得幾好味喎! 不過唔夠熱......

 

海皇粥品: 我好鍾意食海皇果種粥品! 不過老公唔多鍾意食粥~ 加埋香港天氣仲係熱,所以佢掂都唔掂! 只坐喺度望住我食...佢話唔可以理解 - 我點解食得咁enjoy 喎~~

 因為老公唔食,所以我只order 自己果份 - 豬紅牛肉粥, 齋腸, 牛脷酥, 炒米粉 (我想要炒麵架,不過未炒好!) + 豆漿~

全部都係我既! 我平時都係要咁既組合架~~ 老公只食咗幾舊牛脷酥......

 好鍾意佢地既齋腸~ 除咗要豉油之外...仲要落好多好多麻醬 + 辣醬!!!!! 正!!!

 

MOS & Freshness Burger: 我鍾意食粥,老公唔鍾意; 同樣,老公鍾意食漢堡包,但我唔鍾意~ 不過...我地絕對樂意陪對方食既!

 MOS Burger~

 Freshness Burger~

P.S. 老公話雖然2間都好食...不過都係MOS 好食過Freshness 喎! (我見網友時,老公自己一條冷去食Freshness~ 所以我冇試過Freshness......)

  

點煮網贊助

回應

loading
點煮網贊助

孖T香港日食夜食2008 - 好味午餐篇