V媽媽靚正餸2010 - 12月25日, 26日 & 31日
2011-01-24 | ♥ V媽媽靚正餸
12月25日
聖誕節當日因為唔想出街同人逼，所以我要求V媽媽煮飯!
豬橫脷煲粟米; 冬瓜芹菜豆卜釀肉; 白切清遠雞; 白灼雞腸 & 香煎潮州馬頭魚
全部都係我鍾意食既餸~~~~~~ 
本來仲有炸桶蠔 + 煎廚師腸，不過因為V媽媽買冬瓜 + 豆卜買多咗，所以炸蠔 + 廚師腸入咗雪櫃唔整住!! 
唔知大家有無發現一樣野 - 我從來未煮過冬瓜! 
其實我本身唔算好鍾意食冬瓜，不過間中都想食吓~ 但依度唔係時時有靚冬瓜賣，而且買親都要買一大舊，加上老公又至憎冬瓜......咁點整呢? 
今次返香港我好鍾意V媽媽依味冬瓜芹菜豆卜釀肉，所以叫V媽媽encore 咗一次!
(今日喺泗和行咁啱見到有芹菜 + 冬瓜賣，買埋包豆腐卜準備老翻依味餸! 
)
回正題......
我超鍾意食豬橫脷，V媽媽買足3條豬橫脷來煲依煲湯，3條都比我食哂!!
(依度只得半隻雞，另外半隻V媽媽用來醃鹹雞~)
我好鍾意食白灼雞腸，用來沾加咗胡椒粉既豉油......正!! 
我由細到大都好憎食馬頭魚! 硬係覺得馬頭魚有一陣怪味......
V媽媽極力游說我依隻潮州馬頭係無怪味既!
好吖~ 一試無妨吖! 
反正我都未食過!!
1. 唔洗打鱗，洗淨瀝乾水後用少許鹽略醃一陣。
2. 燒熱油鑊爆香蒜蓉 + 薑絲，下魚煎香兩面至乾身。
3. 下少許生抽讓魚兩面沾勻，魚上碟。
4. 原鑊下切碎莞茜和蔥花略略爆香，鋪在煎好的魚上即成。
(以上食譜係憑我記憶加少少靠估而成! 
)
>>>>>>>>>>>>>>>>>>>>>>>>>>>>>>>>>>>>>>
12月26日
豬橫脷煲粟米; 清遠鹹雞; 炸桶蠔; 蒸鹹鮮大眼雞 & 灼菜心
醃鹹咗既清遠雞依然咁有雞味，另有一番滋味!
蒸之前要用粗鹽醃一晚過夜，沖乾淨多餘鹽份後瀝乾，再用薑末 + 蒜蓉去蒸。
是晚V媽媽又無整我買果包廚師腸 - 因為佢唔記得溶雪喎!!!! 
>>>>>>>>>>>>>>>>>>>>>>>>>>>>>>>>>>>>>>
12月31日
是晚V媽媽本來唔想煮想出街食~
不過我唸大除夕應該周圍都好多人出街食飯，會好晏先有位!
而且我第二日要早起身，所以我唔想出街食!! 
煎蛋肉碎粉絲湯; 永合隆燒肉 + 燒豬脷; 蒸鹹鮮大眼雞 & 炒菜心苗
咁啱屋企有3條醃緊既大眼雞，原本完全無準備煮飯既V媽媽，臨時臨急去斬料火速搞掂3餸1湯! 
>>>>>>>>>>>>>>>>>>>>>>>>>>>>>>>>>>>>>>
V家一向好鬼夜開飯.......
所以有時我話咗唔返屋企食飯，但返到屋企我一樣會埋位食餸!
(而且多數都會裝埋飯!! )
正正正正正正正正正正!!
回應
社交網